ខ្ញុំសូមរំលឹកបណ្តាំមហាវីរបុរសលោកឧកញ៉ា សឺន គុយ មុននឹងយួនកាត់កទាំងរស់ ដើម្បីកូនខ្មែរគ្រប់រូបចងចាំដូចខាងក្រោម៖ សូមបងប្អូនចងចាំនិងយល់ឲ្យបានច្បាស់ថា ពូជសាសន៍ខ្មែរយើងជាពូជសាសន៍ដែលធ្លាប់ធ្វើមហាអំណាចល្បីល្បាញសុះសាយពេញពិភពលោក។ ហេតុនេះយើងត្រូវមានស្មារតីរឹងប៉ឹងរួមសាមគ្គីគ្នាជានិច្ច កុំជឿពាក្យចាក់រុកបោកប្រាស បំបែកបំបាក់របស់សត្រូវ ឬលក់ក្បាលបម្រើនយោបាយឲ្យគេសម្លាប់ជាតិសាសន៍ខ្លួនឯង ដោយគិតតែពីប្រយោជន៍ បុណ្យស័ក្តិ មាសប្រាក់ផ្ទាល់ខ្លួនឲ្យសោះ។ នៅទីបញ្ចប់ ខ្ញុំជឿជាក់ថា ខ្ញុំម្នាក់ស្លាប់ទៅ នៅមានបងប្អូនកូនខ្មែរជំនាន់ក្រោយជាច្រើនលាននាក់ទៀត ដែលមានឧត្តមគតិជាតិខ្ពង់ខ្ពស់ ហ៊ានប្តូរជីវិត ដើម្បីការពារបូរណភាពទឹកដី សេរីភាព ព្រះពុទ្ធសាសនា និងពូជសាសន៍ឲ្យគង់វង្សពុំខាន។ ជាមួយគ្នានេះខ្ញុំសូមលើកចម្លើយមួយឃ្លារបស់មហាវីរបុរស សឺន គុយ ឆ្លើយនឹងសំនួរមេទ័ពយួនឈ្មោះអុង ឡូវ ដែលសួរថា លោកធុញទ្រាន់នឹងការរស់នៅហើយឬ? មហាវីរបុរសរបស់យើងឆ្លើយថា ពិតប្រាកដណាស់! ប៉ុន្តែ មិនមែនខ្ញុំចង់ស្លាប់មុនពេលព្រះអាទិត្យរះ ឬក្នុងទីងងឹតនោះដែរ គឺខ្ញុំស្លាប់ដើម្បីជាតិខ្ញុំរស់។ បានសេចក្តីថា ខ្ញុំមិនចង់ស្លាប់ដោយក្រសោបយកនូវអយុត្តិធម៌ទៅជាមួយផងនោះទេ។ ប្រសិនបើមុននឹងខ្ញុំស្លាប់ ជាតិខ្ញុំត្រូវតែរស់។ ដកស្រង់ពីឯកសារប្រវត្តិលោកឧកញ៉ា សឺន គុយ។ ថាច់ សេដ្ឋា
ថ្ងៃសុក្រ ៦កើត ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២០ ខែវិច្ឆិកា គ.ស.២០២០
Friday the 6th Waxing Moon of Māgasira B.E.2564 equivalent to November 20, A.D.2020 Year of the Rat